প্রযুক্তিগত বিশ্বত অসমীয়া কিতাপৰ ভৱিষ্যৎ আৰু আমাৰ কতৰ্ব্য

0
5
Books HD

                                                                            -ড° বুলজিৎ বুঢ়াগোহাঁই

প্রযুক্তিগত বিশ্বত(Digital World) অসমীয়া কিতাপৰ ভৱিষ্যৎ কি হ’ব সেই বিষয়ে সকলোৰে মনত প্রশ্ন উদয় হয় । এটা কথা মনত ৰখা ভাল যে ছপা কিতাপৰ আদৰ সদায় থাকিব । তাত কোনো সন্দেহ কৰিব নালাগে । কিয়নো ছপা কিতাপ এখন পঢ়ি যি আনন্দ পোৱা যায় তেনে আনন্দ আন কোনো মাধ্যমত পোৱা নাযায় সেই কথা কিতাপ অধ্যয়ন কৰা সকলোৰে একমত হ’ব । কিন্তু তাৰ বাবে পঠনযোগ্য কিতাপও নিয়মীয়াকৈ অসমীয়া ভাষাত প্রকাশ হ’ব লাগিব আৰু সেই কিতাপবোৰ পাঠকৰ হাতত পৰাও ব্যৱস্থা গ্রহণ কৰিব লাগিব প্রকাশকসকলে । তাৰোপৰি, পঠনযোগ্য কিতাপবোৰৰ সমালোচনা বাতৰি কাকত আৰু আলোচনীত প্রকাশ হ’ব লাগিব । বাতৰি কাকত আৰু আলোচনীবোৰত কিতাপৰ সমালোচনা প্রকাশ কৰা দেখা যায় । এনেধৰণৰ সমালোচনাৰ যোগেদি পাঠকসকলে কিতাপখনৰ বিষয় বস্তুৰ সম্পৰ্কে জানিব পাৰে আৰু কিতাপখন ক্রয় কৰা বা নকৰাৰ সিদ্ধান্ত গ্রহণ কৰিব পাৰে। কিন্তু, কিছুসংখ্যক সমালোচকে কিতাপখনৰ মূল্য, প্রকাশৰ সময় আৰু প্রকাশকৰ নাম আদি উল্লেখ নকৰে । বাতৰি কাকত আৰু আলোচনীবোৰৰ কিতাপ-সমালোচনাত উক্ত কথাবোৰ অন্তৰ্ভুক্ত কৰাটো বাধ্যতামূলক কৰিলে কিতাপখন ক্রয় কৰাত পাঠকসকলৰ সহায় হ’ব।

গ্রন্থমেলাৰ বাকৰিত বহুসংখ্যক অসমীয়া কিতাপ উন্মোচন কৰা হয় । উন্মোচনৰ খবৰসমূহ কেৱল স্থানীয় বা মহানগৰী সংস্কৰণতে প্রকাশ হোৱা দেখা যায় কিন্তু, দৈনিক বাতৰি কাকতবোৰৰ সকলোবোৰ সংস্কৰণত প্রকাশ হোৱা দেখা নাযায় । বর্ত্তমান অসমীয়া ভাষাত ১৫খনতকৈ অধিক দৈনিক বাতৰি কাকত প্রকাশ হয় । কিন্তু, সকলোবোৰ দৈনিক বাতৰি কাকত কিনি পঢ়াটো সম্ভৱ নহয় , ফল স্বৰূপে কিতাপ উন্মোচনৰ সকলো খবৰ ৰাইজে গম নাপায় । এই সমস্যা সমাধানৰ কাৰণে তথ্য-প্রযুক্তিৰ সহায় ল’ব পৰা যায়। গ্রন্থমেলাৰ আয়োজকসকলে কিতাপ উন্মোচনৰ তথ্য সন্নিবিষ্ট একোটিকৈ ৱেবচাইট তৈয়াৰ কৰিব লাগে যাতে, ৰাজ্যখনৰ লগতে বিশ্বৰ বিভিন্ন ঠাইত থকা প্রবাসী অসমীয়া সকলেও গ্রন্থমেলাৰ সবিশেষ তথ্য লাভ কৰিবলৈ সক্ষম হয়।

অসমীয়া কিতাপৰ পঢ়ুৱৈৰ সংখ্যা হ্রাস হৈছে বুলি সঘনাই এক অভিযোগ উঠা দেখা যায় । বৰ্তমান অসমত নিজৰ মাতৃভাষাটো পঢ়িব পৰা আৰু লিখিব পৰা লোকৰ সংখ্যা লাহে লাহে কমি অহাটোৱেই ইয়াৰ মূল কাৰণ বুলি ক’ব পাৰি। যিকোনো মাধ্যমতে অধ্যয়ন কৰিলেও অসমত বসবাস কৰা প্ৰত্যেকজন ব্যক্তিয়েই যাতে অসমীয়া ভাষাটো শুদ্ধকৈ পঢ়িব আৰু লিখিব পাৰে তাৰ ব্যৱস্থা গ্রহণ কৰিব লাগে । এই ক্ষেত্রত সকলোৱেই সজাগ হোৱাটো বাঞ্চনীয় । দ্বিতীয়তে , বহু সংখ্যক লেখকে নিজৰ লেখাসমূহত অসমীয়া ভাষাৰ কিতাপৰ উদ্ধৃতিৰ সলনি ইংৰাজী ভাষাৰ কিতাপৰ উদ্ধৃতিৰ অধিক ব্যৱহাৰ কৰা দেখা যায় । যিকোনো এখন কিতাপ পঢ়াৰ পূৰ্বে আগতীয়াকৈ কিতাপখনৰ বিষয়ে জনাৰ সুবিধা লাভ কৰিব লাগিব । সেয়েহে, লেখকসকলে পঢ়ুৱৈ সকলৰ সুবিধাৰ্থে অসমীয়া কিতাপৰ উদ্ধৃতি লেখাসমূহত উল্লেখ কৰিলে অসমীয়া কিতাপসমূহৰ বিষয়ে অৱগত হ’ব আৰু অসমীয়া কিতাপৰ পঢ়ুৱৈ সংখ্যাও বৃদ্ধি হ’ব । ইয়াৰোপৰি,বাতৰি কাকত আৰু আলোচনী সমূহত প্রৱন্ধৰ লগত সংগতি থকা আলোকচিত্র প্রদৰ্শন কৰোতে অসম সম্পৰ্কীয় আলোকচিত্রৰ সলনি বিদেশৰ আলোকচিত্রহে অধিক সংখ্যক ব্যৱহাৰ কৰা দেখা যায়। উদাহৰণস্বৰূপে , কিতাপ সম্পৰ্কীয় লেখা-মেলাত ইংৰাজী ভাষাৰ কিতাপৰ ছবিৰ সলনি অসমীয়া ভাষাৰ কিতাপবোৰৰ ছবি প্রদৰ্শন অধিক হ’লে অসমীয়া ভাষাৰ কিতাপৰ অলপ হ’লেও প্রচাৰ হ’ব আৰু পঢ়ুৱৈসকলে কিতাপসমূহ ক্রয় কৰিবলৈ আগ্রহী হ’ব ।

লেখকসকলেও নিজ নিজ গ্রন্থৰ প্রকাশৰ ক্ষেত্রত উল্লেখনীয় ভূমিকা গ্রহণ কৰিব পাৰে । বৰ্তমান যুগত ই প্রয়োজনীয় হৈ পৰিছে, কিয়নো অসমত দিনে দিনে গ্রন্থ প্রকাশৰ সংখ্যা বৃদ্ধি হোৱাত বহুসংখ্যক কিতাপ পঢ়ুৱৈ সকলৰ দৃষ্টিগোচৰ নহয়। এই সমস্যা সমাধানৰ বাবে তথ্য-প্রযুক্তিৰ সহায় ল’ব পাৰে । উদাহৰণস্বৰূপে, লেখকসকলে ছ’চিয়েল নেটৱর্কিং ছাইট-ফেচবুকৰ নিজৰ wall আৰু WhatsAppৰ যোগেদি গ্রন্থখনৰ বিষয়ে অৱগত কৰাব পাৰে। তদুপৰি , গ্রন্থৰ উপযোগিতা চাই বিবাহ, জন্মদিন আদি অনুস্থানটো উপহাৰ স্বৰূপে আগবঢ়াব পাৰে ।

অসমত সাধাৰণতে হাইস্কুল শিক্ষান্ত আৰু উচ্চতৰ মাধ্যমিক পৰীক্ষাতবিশেষ ভাবে কৃতিত্ব অর্জন কৰা শিক্ষার্থীসকলক আনুষ্ঠানিকভাৱে অভিনন্দন জ্ঞাপন কৰাৰ লগতে বিভিন্ন উপহাৰ দিয়া দেখা যায় । উপহাৰ স্বৰূপে শিক্ষাৰ্থীসকলক নির্বাচিত কিতাপৰ টোপোলা প্রদান কৰিব পাৰে , যিবোৰ কিতাপৰ দ্বাৰা শিক্ষাৰ্থীসকলকৰ মানসিক তথা বৌদ্ধিক বিকাশত সহায় হোৱাৰ লগতে সামাজিক দ্বায়বদ্ধতাৰ কথাও মনলৈ আহে।

কিতাপৰ পঢ়ুৱৈৰ সংখ্যা বঢ়াবলৈ হ’লে গ্রন্থ অধ্যয়ন অভ্যাস কেনেকৈ গঢ়িব পাৰি সেই বিষয়ে জনাব লাগিব। গ্রন্থ অধ্যয়ন অভ্যাস গঢ়িবলৈ হ’লে আমি প্রথমতে জানি ল’ব লাগিব গ্রন্থৰ অধ্যয়নৰ প্রয়োজনীয়তা কিমান । গ্রন্থ অধ্যয়নৰ বাবে বিভিন্ন জনে বিভিন্ন উপায় অৱলম্বন কৰিব পাৰে । যেনে- গ্রন্থ অধ্যয়ন লক্ষ্য ঠিক কৰি ল’ব লাগিব, প্রত্যক মাহত অধ্যয়ন কৰিবৰ বাবে গ্রন্থৰ তালিকা প্রস্তুত কৰি ল’ব লাগিব, প্রত্যেক দিনে কেইটামান পৃষ্ঠা পঢ়িব লাগিব, গ্রন্থ অধ্যয়নৰ সময় নিৰ্ধাৰণ কৰিব লাগিব, গ্রন্থাগাৰৰ সদস্য হ’ব পাৰে, টেলিভিচন,ইণ্টাৰণেটৰ ব্যৱহাৰ কমাব লাগিব, দৈনন্দিন জীৱনৰ লগত গ্রন্থ অধ্যয়নৰ সংযোগ বিচাৰি উলিয়াব জানিব লাগিব, গ্রন্থ অধ্যয়নৰ লগত নিজৰ ৰাপ আৰু আগ্রহৰ সমন্বয় ঘটোৱা ইত্যাদি মাতৃভাষাৰ প্রচাৰ আৰু প্রসাৰত আমাৰ সকলোৰে দ্বায়িত্ব আছে ।

আমি নিজেও এই বিষয়ত আগ ভাগ লৈছো । শদিয়াৰ পৰা ধুবুৰীলৈকে বিভিন্ন শিক্ষানুষ্ঠান তথা অনুষ্ঠান-প্রতিষ্ঠানৰ ৰূপালী,সোণালী,হীৰক জয়ন্তী আদি উপলক্ষে প্রকাশিত স্মৃতিগ্রন্থ তথা বাৰ্ষিক মুখপত্র আৰু বিভিন্ন আলোচনী, বাতৰিকাকতবোৰলৈ মাতৃভাষাত কেৰিয়াৰ বিষয়ৰ লেখা প্রেৰণ কৰিছো আৰু প্রকাশ হৈছে। এইদৰে লেখা প্রেৰণ কৰাৰ উদ্দেশ্য হ’ল – ৰাজ্যখনৰ গাঁৱে-ভূঞে তথা চহৰে-নগৰে বসবাস কৰা কিছু সংখ্যক ছাত্র-ছাত্রী অলপ হ’লেও যাতে কেৰিয়াৰ বিষয়ৰ লেখাবোৰৰ পৰা উপকৃত হয় আৰু মাতৃভাষাত প্রকাশিত লেখাবোৰ পঢ়িবলৈ চেষ্টা কৰে । প্রায় পোন্ধৰ বছৰ ধৰি প্রতি শনিবাৰে বিয়লি ৬ বজাৰ পৰা ৯ বজাৰ ভিতৰত ফোন (০৯৪৩৫১৮৮৬৩০) যোগেদি কেৰিয়াৰ সম্পৰ্কে কৰা প্ৰশ্নৰ উত্তৰ মাতৃভাষাত দি আহিছো । ১০০টাতকৈ অধিক কেৰিয়াৰ বিষয়ৰ কৰ্মশালা-আলোচনা চক্রত অংশগ্রহণ কৰি ছাত্র-ছাত্রীসকলৰ লগত মুখা-মুখিকৈ কেৰিয়াৰ বিষয়ৰ কথাবোৰ মাতৃভাষাত আলোচনা কৰিছো । তাৰোপৰি , ইউনিক’ডত ই-আলোচনী ,ব্লগ তথা ছ’চিয়েল নেটৱৰ্কিং ছাইটতো মাতৃভাষাত আমাৰ লেখা নিয়মীয়াকৈ প্রকাশ হৈ আহিছে ।

Facebook Comments

LEAVE A REPLY

Please enter your comment!
Please enter your name here