ভাৰত হ’ব পাৰে কুৰ্দ জাতিৰ বাবে মিত্ৰ দেশ

0
9

প্ৰাগজ্যোতিষ বাৰ্তা, গুৱাহাটীৰ পৰা মনীষা শৰ্মা, ২ ডিচেম্বৰঃ সাংবাদ দাতা ,মনীষা শৰ্মা:ভাৰতৰ গণতন্ত্ৰ, ভিন্নতাৰ মাজত একতা, জাতিগত পৰিচয়ক সন্মান জনাই পশ্চিম এছিয়াৰ সংগ্ৰামৰত কুৰ্দ জাতিৰ যুৱ প্ৰতিনিধি ডিয়াৰি খালিড মাৰীফে কুৰ্দসকলৰ বাবে মিত্ৰ দেশ বুলি অভিহিত কৰে হিন্দু প্ৰধান এই দেশখনক।

কুৰ্দ জাতিয়ে ইছলামকে আদি কৰি বিভিন্ন ধৰ্মালম্বীলোকক সামৰি লোৱা বুলি উল্লেখ কৰি মাৰীফে দাবী কৰে যে তেওঁলোকৰ বাবে জাতিৰ পৰিচয় সদায় আগত।

গুৱাহাটী প্ৰেছ ক্লাবৰ সদস্য সাংবাদিকৰে শনিবাৰে সন্ধিয়া ভিডিও কনফাৰেন্স যোগে হোৱা এক বাৰ্তালাপত মাৰীফে কয় যে বহুদশকজুৰি নিপীড়িত হৈ থকাৰ পাছতো কুৰ্দসকলে ধৰ্মীয় মৌলবাদক প্ৰশ্ৰয় দিয়া নাই।

বৰঞ্চ মুছলিম প্ৰধান কুৰ্দসকলে আইছিছৰ দৰে সন্ত্ৰাসবাদী সংগঠনক প্ৰতিৰোধ কৰি আহিছে।

চাৰিখন মুছলিম প্ৰধান ৰাষ্ট্ৰ তুৰ্কী, ইৰাণ, ইৰাক আৰু চিৰিয়াত অত্যন্ত প্ৰতিকূল পৰিবেশত সংগ্ৰাম চলাই যোৱা কুৰ্দসকলৰ অন্য এক বৈশিষ্ট্য হ’ল নাৰীৰ প্ৰতি যথোচিত সন্মান।

সেয়ে যি সময়ত আইছিছে নাৰীক ভোগ্যসামগ্ৰী ৰূপে ব্যৱহাৰ কৰে তেনে সময়তে কুৰ্দ সকলৰ সশস্ত্ৰ মহিলা গোটো আছে।

এখন সন্মিলিত স্বধীন কুৰ্দিস্তানৰ বাবে সংগ্ৰাম চলাই অহা কুৰ্দসকলে এতিয়া আশা কৰে ভাৰতৰ দীৰ্ঘকালীন সহযোগ।

ভাৰতৰ দৰে এখন সমৃদ্ধ এখন দেশৰ নাগৰিকে সমৰ্থন জনালে মুক্তিকামী কুৰ্দসকলৰ সপোন সফল হোৱাটো নিশ্চিত, এয়া মাৰিৰ মন্তব্য।

কিছুবছৰ আগতে পুনে বিশ্ববিদ্যালয়ৰ পৰা ৰাজনীতি বিজ্ঞানৰ স্নাতকোত্তৰ পাঠ্যক্ৰম সম্পন্ন কৰা মাৰীফে অপকটে স্বীকাৰ কৰে যে সহনশীলতা, সংখ্যালঘুৰ প্ৰতি সন্মান আৰু গণতান্ত্ৰিক প্ৰমূল্যবোধৰ আদিপাঠ তেওঁ এই ভূ-খণ্ডৰ পৰাই শিকিছে।

অন্যএক প্ৰসংগত মাৰীফে কাশ্মীৰৰ মুছলমানসকলৰ প্ৰতি সমবেদনা দেখুওৱা তুৰ্কীক কটাক্ষ কৰি কয় যে তেওঁলোকে মুছলমান কুৰ্দসকলক নিৰ্বিবাদে অত্যাচাৰ কৰি আহিছে ।

অলপতে তুৰ্কীৰ এনে অমানৱীয় পদক্ষেপক কটু সমালোচনা কৰিছে ভাৰত চৰকাৰে আৰু সেয়ে মাৰীফে আশাকৰে যে নৰেন্দ্ৰ মোডীৰ নেতৃত্বাধীন চৰকাৰখনে আন্তৰ্জাতিক পৰ্যায়তো লাঞ্চিত কুৰ্দসকলৰ পক্ষ ল’ব। স্বাভিমানী কুৰ্দ জাতিয়ে ইয়াৰ প্ৰতিদান সময়ত নিশ্চয় দিব বুলিও মাৰীফে দাবী কৰে।

সংকট কালতো নিজৰ ভাষা আৰু স্বকীয়তা ৰক্ষাৰ বাবে কুৰ্দসকলে অহৰহ চেষ্টা কৰি গৈছে।

ইন্টাৰনেট টেলিভিছনৰ জৰিয়তে নিজৰ সংস্কৃতিৰ সম্প্ৰচাৰ আৰু সংৰক্ষণত জোৰ দিয়া কুৰ্দসকলে বিশ্বৰ বিভিন্ন ক্ষুদ্ৰ জাতিসত্তাৰ ভাষা – সংস্কৃতিৰ ৰক্ষাৰ আদৰ্শ হিচাপে পৰিগণিত হৈছে।

দেশবিহীন হৈয়ো এটা জাতিয়ে কিদৰে স্বকীয় বৈশিষ্ট্য বজাই ৰাখিব পাৰে তাৰ উৎকৃষ্ট উদাহৰণ ৰূপে স্বীকৃত হৈছে নিৰন্তৰ সংগ্ৰামী কুৰ্দসকল।

Facebook Comments

LEAVE A REPLY

Please enter your comment!
Please enter your name here