চামগুৰিত মহাৰাষ্ট্ৰৰ পৰা অহা যুৱক ক’ভিড-১৯ আক্ৰান্ত

প্ৰাগজ্যোতিষ বাৰ্তা, চামগুৰিৰ পৰা বিদ্যুত জ্যোতি বৰা, ৪ জুনঃ নগাঁও জিলাৰ চামগুৰিত বহিঃ ৰাজ্যৰ পৰা অহা আৰু এজন যুৱকৰ দেহত ক’ভিড ১৯ ধৰা পৰিছে।

চামগুৰিৰ কাছখাইটিৰ লাওখোৱা আদৰ্শ বিদ্যালয় কোৱাৰেণ্টাইন কেন্দ্ৰত থাকি অহা এই যুৱকজনকো কালি বিয়লি কোৱাৰেণ্টাইন কেন্দ্ৰৰ পৰা হোম কোৱাৰেণ্টাইনৰ বাবে স্থানীয় প্ৰশাসনে প্ৰেৰণ কৰিছিল।

কাছখাইটিৰ কোৱাৰেণ্টাইন কেন্দ্ৰত বহিঃৰাজ্যৰ পৰা অহা লোকৰ ক’ৰ’ণা ভাইৰাছৰ অৱস্থিতি ধৰা পৰা এইটো চতুৰ্থটো ঘটনা।

আনহাতে,কাছখাইটি কোৱাৰেণ্টাইন কেন্দ্ৰৰ পৰা নমুনা পৰীক্ষাৰ ফলাফল নহাকৈ হোম কোৱাৰেণ্টাইনলৈ পঠিৱাৰ পাছত ক’ভিড ১৯ পজিটিভ ওলোৱা এইটো দ্বিতীয়টো ঘটনা।

ইয়াকে কেন্দ্ৰ কৰি এতিয়া চামগুৰিত আতংকৰ সৃষ্টি হৈছে।মহাৰাষ্ট্ৰৰ পৰা অহা এই যুৱকজন হৈছে চামগুৰি সমষ্টিৰ গেৰুৱামুখ কোটাইনীগাঁৱৰ আব্দুল বাতেনৰ পুত্ৰ আব্দুল কৰিম(২৭)।

ৰে’ল যোগে মহাৰাষ্ট্ৰৰ পৰা অহাৰ পাছত ২৬ মে’ৰ দিনা যুৱকজনক কাছখাইটিৰ কোৱাৰেণ্টাইন কেন্দ্ৰত ভৰ্তি কৰা হৈছিল।

চৰকাৰী নিয়মানুসৰি সাতদিন হোৱাৰ বাবে মঙ্গলবাৰৰ দিনা যুৱকজনক মুকলি কৰি হোম কোৱাৰেণ্টাইন হ’বলৈ নিৰ্দেশ দিছিল।

চামগুৰিত ঘৰ আহি সোমোৱাৰ পাছতেই দুজনকৈ যুৱকৰ শৰীৰত কভিড ১৯ ধৰা পৰাৰ ঘটনাই এতিয়া চামগুৰি বাসী ৰাইজক আতংকগ্ৰস্ত কৰি তুলিছে।

স্থানীয় সচেতন ৰাইজে স্ৰাৱ পৰীক্ষাৰ ফলাফল ওলোৱাৰ পাছতহে কোৱাৰেণ্টাইন কেন্দ্ৰত থকা লোকক মুকলি কৰি দিবলৈ চৰকাৰক আহ্বান জনাইছে।

পৰিতাপৰ বিষয় চামগুৰিতে দুজনকৈ কভিড ১৯ আক্ৰান্ত মুকলি হৈ মুক্ত বিচৰণ কৰি সামাজিক সংস্পৰ্শলৈ অহাৰ পাছত কৰ’না ভাইৰাছৰ অৱস্থিতি ধৰা পৰা পাছত অচিৰেই চামগুৰিত ক’ভিড ১৯ সংক্ৰমিত হ’ব বুলি ৰাইজৰ মাজত শংকা ঘনীভূত হৈছে।

ইপিনে,কালি কাছখাইটি কোৱাৰেণ্টাইন চেণ্টাৰৰ পৰা মুকলি কৰি দিয়া আব্দুল কৰিম এখন টেম্প’ত ঘৰলৈ আহিছিল। টেম্প’খন চিনাক্ত কৰা হৈছে বুলি চামগুৰি ৰাজহ চক্ৰ বিষয়াগৰাকীয়ে জানিবলৈ দিয়ে যদিও তথ্য দিয়াৰ পৰা বিৰত থাকে ।

লগতে ১০ জনক হোম কোৱাৰেণ্টীন কৰা হৈছে বুলি জানিব দিয়ে। ইপিনে শেহতীয়া ভাবে জানিব পৰা মতে, কাছখাইটি কোৱাৰেণ্টাইন কেন্দ্ৰত বৰ্তমানলৈকে ১৬৬ জনৰ ৬৩ জন, লাইলুৰি ছাত্ৰী নিবাসৰ ১০৫ জনৰ৫৭ জন, আমনি বহুমুখী কেন্দ্ৰৰ ৫৯ জনৰ ৩০ জন, আমনি এছ আই আৰ ডি কেন্দ্ৰৰ ৩৯ জনৰ ১৯ জনক হোম কোৱাৰেণ্টীনৰ বাবে প্ৰশাসনে প্ৰেৰণ কৰাৰ বিপৰীতে আমলখি হাইস্কুলত ৩৯ জন আৰু চামগুৰি উচ্চতৰ মাধ্যমিক বিদ্যালয় কেন্দ্ৰত ১০ জনকে ধৰি মুঠ ২৪৯ জন কোৱাৰেণ্টাইন হৈ আছে।

Facebook Comments

LEAVE A REPLY

Please enter your comment!
Please enter your name here