প্ৰাগজ্যোতিষ বাৰ্তা, চামগুৰিৰ পৰা বিদ্যুত জ্যোতি বৰা, ৯ নৱেম্বৰ ২০ঃ নগাঁও জিলাৰ চামগুৰি আৰক্ষী থানাৰ অধীনৰ কঠালগুৰি গাঁও পঞ্চায়ত অঞ্চলত কৃত্ৰিমভাৱে সৃষ্টি কৰা নীলাপানীৰ নামৰ হ্ৰদটোক কলিয়াবৰ মহকুমা প্ৰশাসনে ভাৰতীয় দণ্ডবিধি আইনৰ অধীনত ১৪৪ ধাৰা বলৱৎ হোৱাকৈ জাৰি কৰিছে।
কলিয়াবৰ মহকুমাধিপতি বিতোপন নেওগে জাৰি কৰা এক আদেশ মৰ্মে কলিয়াবৰ মহকুমাৰ অধীনৰ পাহাৰীয়া অঞ্চল কঠালগুৰিস্থিত কৃত্ৰিম নীলাপানী হ্ৰদটোত বলৱৎ হোৱাকৈ ১৪৪ জাৰি কৰাৰ লগতে হ্ৰদটোত কোনো লোকে নামিব নোৱাৰিব, সাঁতুৰিব নোৱাৰিব,জঁপিয়াব নোৱাৰিব।
ইয়াৰ উপৰিও সমগ্ৰ অঞ্চলটোত কোনো ব্যক্তিয়ে নিচাযুক্ত সামগ্ৰী ব্যৱহাৰ কৰিব নোৱাৰিব বুলি জাননীখনত উল্লেখ থকা বুলি জানিব পৰা গৈছে।
যদি কোনো লোকে এই আদেশ অমান্য কৰে তেন্তে আইন অনুসৰি অপৰাধী বুলি গণ্য কৰা হ’ব।
উল্লেখ্য যে উক্ত নীলাপানীৰ হ্ৰদটোত বিগত দুইমাহত দুজনকৈ চফল ডেকা সাঁতুৰিবলৈ গৈ কৰুণভাৱে মৃত্যুক সাবটি ল’বলগা হৈছিল।
এইক্ষেত্ৰত স্থানীয় ৰাইজে সংবাদ মাধ্যমৰ জড়িয়তে নীলাপানীৰ হ্ৰদটোত বিহীত ব্যৱস্থা গ্ৰহণ কৰিবলৈ দাবী জনাইছিল।
আৰু মহকুমা প্ৰশাসনে ৰাইজ তথা সংবাদ মাধ্যমৰ দাবীৰ প্ৰতি সন্মান জনাই যোৱা নিশা ১৪৪ ধাৰা জাৰি কৰে বুলি মহকুমা প্ৰশাসন ফালৰ পৰা জানিব পৰা গৈছে।
